Serie B

El términu serie B (B movie, n'inglés) designó nos anicios a un llargumetraxe producíu con un presupuestu pequeñu y destináu a una distribución ensin publicida, proyectáu en cines de sesión doble (dos películes proyectaes al preciu d'una sola), demientres la edá d'oro del cine americanu. A pesar de la pérdida de puxu de la serie B a fines de los años cincuenta, el términu ye utilizáu nun sentíu más llargu, designando a tolos films de pocu presupuestu, dexando de llau los ensayos y les películes pornográfiques.

Les películes de serie B fueron una respuesta de los estudios de Hollywood a la cayida d'audiencia nel tiempu de la depresión, depués del crack económicu que sufrió Estaos Xuníos en 1929.

Per esa dómina el cine d'Estaos Xuníos creara una economía y una industria mui especializaes. Yá nos años 20 apaecieron el Sistema d'estudios o "studio system", el sistema d'estrelles o "Star-system", y el cine de xéneros cinematográficos. Y la llegada del cine sonoru confirmó l'oligopoliu cinematográficu, absolutu control del mercáu por parte d'un pequeñu númberu d'empreses, les llamaes Majors: Warner Bros, Metro Goldwyn Mayer (MGM), Paramount, RKO, 20th Century Fox, Universal Studios, Columbia Pictures y United Artists. Esta última ensin producciones propies, yera la encargada de la distribución de películes de productores independientes.